O da la miúda é un proxecto que se centra en realizar traballos de estudo da distribución, reprodución, fenoloxía e etoloxía do lobo no norte da provincia de Lugo, mantendo un seguimento continuado. “O da la miúda” é un dos moitos nomes “noa” que recibe o lobo en Galicia, neste caso recollido no concello de Abadín,  e que se empregan para evitar pronunciar o seu nome, pois crese que de facelo atraeríase a súa presenza.

No 2018 comezamos a traballar no estudo dun grupo próximo aplicando unha metodoloxía diferente á empregada na maior parte dos censos, na que os índices quilométricos de abundancia (IKA) de indicios (fundamentalmente excrementos) non son utilizados para determinar a presenza de grupos ou reprodución, senón como unha axuda para tecer unha rede de cámaras de foto-trampeo que nos permiten coñecer moitos detalles dos animais e grupos observados: sexo, idade aproximada, enfermidades, furtivismo, comportamento ou alimentación, sendo capaces en moitas ocasións de identificalos individualmente para evitar así a omisión ou duplicación de grupos familiares. O obxectivo é realizar un seguimento continuado que cremos fundamental para analizar con perspectiva a situación da especie na zona.