A primeira liña de traballo  de REBINXE foi o que se denominamos “Proxecto Cadullos”, que incide no estudo de diferentes especies que poden actuar como controladoras naturais de pragas, ou que resultan dalgún xeito beneficiosas para a agricultura. Estes aliados atópanse a miúdo ameazados e sobre eles pesan lendas, mitos e crenzas que dificultan a súa conservación. Falamos de mamíferos coma o raposo, o gato montés, diferentes especies de mustélidos, serpes e aves rapaces que depredan sobre micromamíferos; tamén de pequenas aves, réptiles, anfibios e mamíferos coma morcegos ou ourizos que se alimentan de insectos, lesmas ou caracois. En xeral trátase de pór en valor a importancia de manter ecosistemas agrícolas o máis biodiversos posible para evitar a aparición de pragas, fomentando a presenza tamén destes animais e rachando con mitos e crenzas que perseguen a algúns deles dende séculos.

Búscase obter datos poboacionais de interese para a súa conservación, divulgar os beneficios da súa presenza entre os agricultores da zona para reducir o uso de biocidas e realizar accións como a instalación de caixas niño e refuxios para diferentes especies.